Tenor Berset è la revisiun da la tariffa da medis Tarmed in regulatur pussaivel. En cas ch'ils partenaris da tariffa na vegnan betg perina, po el ordinar midadas. Berset ha gia annunzià ch'el veglia far quai tar las prestaziuns da spezialists nua ch'i exista il privel da perder la controlla. I dettia adina dapli cas nua che spezialists vegnan clamads.
Mirar co auters pajais van enturn cun quai
Il minister da sanadad ha plinavant annunzià da vulair examinar models da l'exteriur per diriger il creschament da tals cas da spezialists. Tranter auter vul el dar in'egliada sin il sistem en Germania ed en ils Pajais Bass. Ils Pajais Bass han per exempel in sistem da sanadad fermamain centralisà. Vul dir, las cassas da malsauns na ston betg pajar las prestaziuns da tut ils medis. Ultra da quai è la gulivaziun da ristgs bler pli differenzià en ils Pajais Bass. Il medem vala er per la Germania, nua ch'ils singuls cass vegnan administrads bler pli stretg.
Gruppa d'experts examinescha
Alain Berset ha engaschà ina gruppa d'experts, surtut cun persunas da quests dus pajais europeics. En il decurs dad in onn vul el preschentar propostas concretas. Per sminuir ils custs stoppian dentant er las autras partidas da discussiun far in pass.
RR novitads 11:00
