Malgrà las cundiziuns da basa difficilas è la bilantscha per l'onn 2015 dals albierts per la giuventetgna positiva. Cun 746'988 pernottaziuns ed ina svieuta da 46,6 milliuns francs han las jugis registrà - l'onn 2015 - il segund-meglier resultat en l'istorgia da lur organisaziun ch'exista passa 90 onns.
Las cundiziuns da basa na sajan betg stadas bunas per il turissem en general l'onn 2015. Il schaner era il curs minimal per l'euro vegnì abolì, la stagiun d'enviern 2015/2016 ha cumenzà senza naiv e las vacanzas da Nadal èn stadas curtas cun mo in'emna. Pervi dal ferm franc svizzer han ils albierts nudà in digren 21% da giasts da la regiun da l'euro. Malgrà questas cundiziuns sajan surtut ils giasts svizzers stads fidaivels als albierts per la giuventetgna. 64,9 % dals giasts sajan stads svizzers, annunzia l'organisaziun. Quai saja 0,9 % dapli che l'onn avant.
L'organisaziun senza profit cumenza l'onn nov cun bler optimissem. Ella ha era insatge da festivar: Ier ha la giuria dal premi d'ambient premià l'organisaziun cun in pretsch spezial.