Il Departament federal da defensiun crititgescha l’applicaziun d’urgenza «Alertswiss». Quai demussan retschertgas da SRF Investigativ. Problematic saja ch’ina firma tudestga saja involvida tar la derasaziun da messadis da push. Quai pudess esser in problem, sche sistems a l’exteriur vegnian interruts – constatescha in rapport d’examinaziun intern dal departament da defensiun.
Per quest motiv recumonda el a l’Uffizi federal da la protecziun da la populaziun d’examinar, sch’ina firma en Svizra pudess trametter ils messadis da push. Uschia vegniss quest ristg minimà.
Finanzialmain betg realisabel
Tenor l’uffizi responsabel na dettia actualmain nagina firma en Svizra che pudess far quai. En pli fissi fitg char da stgaffir ina tala purschida. Plinavant fa l'uffizi er attent ch'ina app na saja uschè u uschia betg in servetsch resistent per crisas perquai ch'el sa basia sin sistems da Google ed Apple. Pia er cun ina firma svizra per distribuir ils pushs, fiss l'app anc adina dependenta da sistems da l'exteriur.
Avertiments d'aura èn il pli tard dapi la catastrofa d'inundaziuns da l'onn passà en Germania en ils chaus da la glieud e vegnan savens discutads. Avant in onn avevan numnadamain desditg ils sistems da las autoritads ed alarmar la glieud n'ha u insumma betg funcziunà u be parzialmain u memia tard. Var 200 persunas han pers lur vita en las inundaziuns.
