Persunas ch'èn allergicas cunter pollen èn mumentan intschertas sch'ellas han la strucca pervia da pollen u corona. Pussaivel è omadus.
Persunas allegricas èn surstadas
Malgrà che las temperaturas èn actualmain anc d'enviern, ha la strucca da fain gia cumenzà per intgins. Il center svizzer per allergias «aha!» annunzia, ch'i dettia il mument bleras dumondas da persunas pertutgadas, che sajan surstadas ch'ellas han gia ussa la strucca da fain. Quels sajan malsegiras schebain i sa tracta propi d'ina reacziun allergica u sch'ellas han sintoms da corona.
Nitscholers flureschan gia
In'allergia saja bain pussaivla, uschia il center d'allergias. Ils nitscholers han per part gia cumenzà a flurir. Quels dovran be in zic sulegl ed ina temperatura da sur tschintg grads per pudair flurir. Cumpareglià cun auters onns è quai fitg baud, capita però adina puspè.
Differents sintoms
Tgi ch'è malsegir sch'i è corona u la strucca da fain duai telefonar a sia media u ses medi. Però datti ina differenza tar ils sintoms. Attatgas da starnidar, egls irritads, larmants e cotschens, sco er il tschiel da la bucca, il nas e las ureglias che mordan, inditgeschan in'allergia. Sco er cunter corona, pon ins sa proteger cunter pollen cun ina mascrina.