Siglir tar il cuntegn

Header

cuntegn

Svizra «Allianza cunter la natira» sbitta refurma da l'armada

La refurma da l'armada a fatg naufragi tar la votaziun finala en il Cussegl naziunal. 86 parlamentaris han vuschà cunter la refurma, 79 èn stads per questa.

Las vuschs cunter la refurma da l'armada èn vegnidas dals Socialdemocrats, dals Verds e da la Partida populara. Entant che la sanestra vuleva in'armada anc pli pitschna che discutà en il cussegl, aveva la PPS pretendì dapli schuldada e dapli daners per l'armada.

audio
Bunura: «Allianza cunter la natira» sbitta refurma da l'armada
ord Actualitad dals 19.06.2015.
laschar ir. Durada: 4 minutas 2 Secundas.

Reacziuns suenter la fin andetga

Christoph Darbellay da la PCD ha discurrì d’ina classica allianza cunter la natira che fetschia empaglia il pajais. Per Barbara Gysi da la PS è la decisiun succedida perquai che l’armada saja «in fitg grond plazzal da construcziun». Adrian Amstutz da la PPS ha declerà che la cundiziun minimala per sia partida saja da fixar expensas da 5 milliardas francs ad onn per l’armada fix en la lescha. Per Philipp Müller da la PLD è quai in «enorm grond sbagl» da la PPS.

D'accord mo cun reducir la recruta da 21 sin 18 emnas

D'accord cun il Cussegl dals chantuns è il Cussegl naziunal da scursanir la scola da recruta da 21 sin 18 emnas.

Auter tar ils curs da repeziun. Il Cussegl naziunal è insistì ch'i dettia 6 curs da repetiziun a mintgamai 3 emnas. Il Cussegl dals chantuns vuleva obligar l'armada da far mo 5 curs da repetiziun.

Cussegl dals chantuns aveva mo pitschnas midadas

Il cussegl dals chantuns ha gia discutà il svilup da l’armada en la sessiun da primavaira ed ha fatg pitschnas midadas cumpareglià cun la proposta dal cussegl federal.

Cussegl federal e cumissiun han proponì

Da principi vul il minister da defensiun Ueli Maurer in’armada pli pitschna e pli flexibla, persuenter bain scolada ed equipada. Betg dispitaivel è il fatg ch’ils privels per la Svizra èn sa midads ils ultims decennis. Actualmain stettian attatgas da terror e da cyber en il focus, argumentescha la cumissiun da segirtad (SiK).

Ils detagls da la proposta da la SiK ch'il Cussegl naziunal ha debattà:

  • Dumber: 100’000 schuldads
  • Custs: 5 milliardas francs ad onn (total 20 milliardas francs per ils onns 2017 – 2020)
  • Curs da repetiziun: 6 giadas 3 emnas
  • Recruta: 18 emnas
  • Ordinaziun: Fixar l’organisaziun e la grondezia da l’armada en ina ordinaziun e betg en la lescha (lescha na suttastat betg al referendum)

Artitgels legids il pli savens