Siglir tar il cuntegn

Header

cuntegn

Allianza dal Center «Gudagnar elecziuns e tegnair ensemen la Svizra»

Gudagnar elecziuns e tegnair ensemen la Svizra, quai vul il president da l'Allianza dal Center Gerhard Pfister. La devisa saja reunir e betg rinforzar cuntraris ha ditg Pfister en ses pled a chaschun da la radunanza da delegads a Zug.

I dettia differenzas en quest pajais. La sanestra e cunzunt la PPS veglian rinforzar questas differenzas. Il president da l'Allianza dal Center Svizra ha crititgà ils Giuvens socialists ch'emprovian da divider la societad cun lur iniziativa dal cumbat da las classas. La PPS fetschia quai cun sa servir da la citad cunter la champagna.

Er la pandemia da corona maldovria la PPS per motivs politics e sveglia malcuntentientscha entras il cumbat cunter il certificat da covid. Quel vegnia dentant a dar dapli libertad ad ina maioritad da la populaziun.

La partida è en furma
Autur: Gerhard Pfister President AdC

L'Allianza dal Center saja en furma, ha ditg Pfister a chaschun da l'emprima radunanza plenara. Quai grazia a las refurmas, entras quellas èn las structuras internas vegnidas professiunalisadas.

Uss cumenzia gia il cumbat per las elecziuns il 2023, nua ch'el veglia gudagnar electurs e sez en il parlament.

Proximas votaziuns – Gea e Na

Cleramain gea a la «lètg per tuts» e na a l’iniziativa da 99%. La maioritad da las 230 delegadas e delegads èn stads da l'avis ch'i saja temp dad avrir la lètg era per pers omosexuals.

Era tar l'iniziativa da 99 pertschient dals Giuvens socialists èsi stà ina chaussa clera. In dals arguments per il na: l'iniziativa engrevgeschia il process da successiun tar interpresas pitschnas e mesaunas che sajan la pitga principala da l'economia svizra.

RTR novitads 12:00

Artitgels legids il pli savens

Scrollar a sanestra Scrollar a dretga