Siglir tar il cuntegn
Inhalt

Svizra «Almain 43'000 manaschis èn necessari»

La midada da structura en l'agricultura stoppia vegnir franada, uschiglio na possian ils purs betg pli ademplir lur incumbensa constitutiva.

Markus Ritter, president da l'Uniun purila svizra.
Legenda: Markus Ritter, president da l'Uniun purila svizra, è da l'avis che l'agricultura en Svizra na funcziunescha betg senza dazi da protecziun. Keystone

Da questa opiniun è il president da l'Uniun purila svizra, Markus Ritter. Fin il 2030 dovria almain anc 43'000 manaschis, radund 9'000 pli pauc ch'actual ha ditg Ritter en in'intervista cun la gasetta Nordwestschweiz.

Actualmain dettia dentant mintg'onn 1'000 manaschis pli pauc. Uschia na possia betg ir enavant. Per ils purs saja la perspectiva economica decisiva, uschia Ritter. El ha rinforzà sia opposiziun cunter ils plans dal Cussegl federal e sia politica agrara. Cun questa prendia la regenza svizra davent als purs la basa d'existenza.

Il Cussegl federal vul a media vista reducir il dazi da protecziun da l'exteriur per 30 fin 50 pertschient e serrar giu ina convenziun da commerzi liber. Il commerzi liber avra a l'economia da la Svizra gronds martgads da vendita, argumentescha la regenza naziunala.

Dazi da protecziun

In dazi spezial che vegn pretendì tar l'import da rauba. Ins vul uschia proteger l'economia d'in pajais da la concurrenza da l'exteriur.

Betg senza dazis da protecziun

Senza dazis da protecziun na funcziuneschia l'agricultura en Svizra betg, declera Ritter. Ils custs sajan uschiglio memia auts per pudair producir victualias en Svizra. En cumparegliaziun tar la capacitad da cumpra sajan las mangiativas nagliur auter en Europa uschè favuraivel sco en Svizra.

RR novitads 06:00