Siglir tar il cuntegn
Inhalt

Svizra Alpiq examinescha da betg pli far affars cun charvun

Il concern d’energia svizzer Alpiq ponderescha da vender sias duas ovras da charvun tschecas Kladno e Zlín. Quai scriva el sin sia pagina en la rait.

Il logo dad Alpiq, simplamain in maletg simbolic.
Legenda: Alpiq ponderescha da vender duas ovras da charvun en Tschechia. Keystone

Alpiq veglia sa focusar sin in «mund d’energia pli e pli decarbonisà» scriva il concern sin sia pagina en la rait. El na veglia pli naginas ovras da charvun en ses portfolio europeic. Sch’i vegnia ad ina vendita, veglia Alpiq duvrar quels raps per investir selectivamain là, nua ch’ils affars prospereschian – en il sectur «Digital Solutions» – e per optimar vinavant la bilantscha.

Per pudair vegnir fatga, stoppia la vendita render, esser segira ed accumplir cundiziuns da contract. Tge che Alpiq sa metta avant detagliadamain n’explitgescha la communicaziun a las medias betg.

Perdita da 124 milliuns l'emprima mesadad 2018

La fin d’avust da quest onn ha Alpiq annunzià dad avair pers l’emprima mesadad da l’onn 124 milliuns francs. Er per l’entir onn da fatschenta aveva Alpiq quintà cun in resultat operativ pli bass che l’onn passà. Quai en consequenza dals pretschs d’electricitad fixads.

Vegnir a raps cun venditas

Il concern Alpiq sa stenta gia dapi intgin temp dad optimar sia bilantscha cun venditas. Uschia ha Alpiq vendì quest onn gia sia fatschenta d’industria per 850 milliuns francs al concern franzos Bouygues. Entras la vendita veglia sa focusar Alpiq sin sia fatschenta principala, la producziun d'electricitad en Svizra, aveva il concern communitgà quella giada.

Ils plans da vender ina cumpart da sias ovras idraulicas aveva il concern dà si l’avust 2017 cun quai che nagin saja stà pront da pajar il pretsch pretendì.

RR novitads 09:00