L’Uffizi federal da la duana e da la segirezza dals cunfins annunzia 50’185 cas da migraziun illegala. Quai èn stgars 2’000 u 3,6 pertschient pli pauc che l’onn avant.
Bun mintga terza persuna che vegnia tschiffada, derivia da l'Afganistan, scriva l’uffizi federal en sia statistica. Sin plazza dus e trais suondan persunas dal Maroc e la Tirchia.
Il 2023 hai era dà damain cas da suspect da cuntrabanda da persunas. Tut en tut han las autoritads franà 388 cuntrabandists supponids. Questas persunas èn vegnidas surdadas en la regla a la polizia chantunala responsabla. Tut tenor cunvegna cun ils chantuns ha l’Uffizi federal da la duana e da la segirezza dals cunfins era denunzià las persunas direct tar la procura publica cumpetenta.
Dapli persunal en il Tessin
Blers da las migrantas e dals migrants han las autoritads tschiffà en il Tessin. Dapi l'atun 2022 maina la ruta da migraziun vers l'Europa numnadamain da la Serbia via la Bosnia, la Croazia e la Slovenia en l'Italia e vinavant en direcziun nord. Perquai ha la Confederaziun augmentà l'onn passà il dumber da guardias da cunfin en il Tessin.
Il squitsch da migraziun vegn a restar tuttina a vista curta e mezlunga, tenor l'analisa dal Secretariat da stadi per la migraziun SEM. Da far previstas saja difficil, pervi dals territoris da crisa actuals en l'Ucraina, en il Proxim Orient sco er en divers pajais africans.
