Siglir tar il cuntegn
Inhalt

Svizra Als ins vai memia spert, als auters memia plaun

Ils 27 da november vegn votà davart l'iniziativa per l'abandun da l'energia atomara. En il Grischun datti comités per e cunter l'iniziativa dals verds.

Las broschuras dals comités grischuns per ed encunter l'iniziativa per l'abandun da l'energia atomara.
Legenda: Las broschuras dals comités grischuns per ed encunter l'iniziativa per l'abandun da l'energia atomara. RTR, Gion Gieri Flepp

L'iniziativa dals Verds pretenda che tut las ovras atomaras vegnian ord funcziun il pli tard suenter 45 onns en servetsch. Per la Svizra muntass quai che trais ovras vegnissan messas giu gia il 2017 ed il pli tard il 2029 fissan tuttas davent da la rait.

Ils adherents da l'iniziativa, organisaziuns da l'ambient, interprendiders e politichers burgais menziunan tranter auter ils suandants arguments per in gea ils 27 da november:

  • cun tschentar giu las ovras atomaras vegnan promovidas las energias regenerablas (segirezza d'investir en energias regenerablas)
  • il pretsch d'electricitad s'auzass e l'energia idraulica vegniss puspè rentabla
  • i dat avunda energia regenerabla (cunzunt en l'Europa) per remplazzar l'energia atomara e na dovra betg energia atomara u da cotgla da l'exteriur
  • cun metter giu pli spert las ovras atomaras vegn eliminà il privel d'in accident catastrofal
  • ins pudess spargnar tut ils custs che vegnan anc en connex cun la segirezza da las ovras atomaras

Dapli arguments per in gea a l'iniziativa per l'abandun da l'energia atomara datti qua.

Ils comité grischun cunter l'iniziativa che sa cumpona dad exponents da partidas burgaisas e da l'economia menziuna tranter auter ils suandants arguments per in na ils 27 da november:

  • per remplazzar l'energia atomara vegniss importada, pervi dal pretsch bass, energia d'autras ovras atomaras u da las ovras da cotgla en Germania
  • dapli dependenza da l'exteriur periclitass la segirezza dal provediment d'electricitad en Svizra
  • il Grischun e la forza idraulica na profitass betg perquai che las ovras atomaras tutgan als chantuns da la Bassa e quels na sustegnessan pli pauc ils chantuns da muntogna sche las ovras atomaras vegnissan tschentadas giu pli baud, era betg tar ils tschains d'aua
  • ils concerns d'energia pretendessan autas summas da reparaziun (milliardas) sch'ellas stuessan tschentar giu pli baud las ovras atomaras
  • la strategia d'energia 2050 da la Confederaziun prevesa er dad extrar da l'energia atomara dentant uschia che quella po vegnir remplazzada cun energias regenerablas or da la Svizra

Dapli arguments per in na a l'iniziativa per l'abandun da l'energia atomara datti qua.

RR actualitad 17:00