L'Ambassada Rumantscha Turitg è vegnida fundada cun l'idea da crear in lieu da sentupada per las Rumantschas ed ils Rumantschs che vivan en la citad gronda. Il local per quest lieu vegn anc pir fabritgà – e cun el in'entira surbajegiada.
Fundaziun da l'Ambassada Rumantscha Turitg
Radund 25 persunas èn sa radunadas a Turitg per far in emprim pass en direcziun d'in lieu d'inscunter ed in quartier rumantsch a Turitg. Quai cun fundar la nov'uniun Ambassada Rumantscha.
L' uniun ha l'intent da promover la lingua, la cultura e l'identitad rumantscha en il territori grond da Turitg. Per quest intent maina ella in center da scuntrada e cultura che duai servir a la cuminanza rumantscha sco lieu da barat, da furmaziun, da colliaziun e che duai esser in lieu per culturala ed activitads socialas.
Saira da fundaziun da l'Ambassada Rumantscha Turitg
-
Bild 1 von 4. L'impressari turitgais, Theo Schaub, declera il project da la cooperativa da bajegiar. Bildquelle: RTR.
-
Bild 2 von 4. Il project da bajegiar ad Oerlikon en la citad da Turitg pussibilitescha 154 novas abitaziuns. Tenor Theo Schaub e l'Ambassada Rumantscha fissi desiderabel sch'ina massa Rumantschas e Rumantschs vegnissan là ad abitar. Bildquelle: RTR.
-
Bild 3 von 4. Suenter la fundaziun da la nov'uniun e la preschentaziun dal project da bajegiar vegn anc fatg in viva. Bildquelle: RTR.
-
Bild 4 von 4. La suprastanza, il comité da patrunadi ed il secretariat da la nov'uniun Ambassada Rumantscha Turitg. Bildquelle: RTR.
In vitget rumantsch amez Turitg
Las localitads per quest lieu da scuntrada vegn mess a disposiziun dal president da la cooperativa da bajegiar «Zentralstrasse», Theo Schaub. Sia cooperativa posseda blers edifizis a Turitg, uschia er ad Oerlikon a la Wallisellenstrasse. La surbajegiada che stat actualmain là, è dals onns 1942/1943 e na corresponda betg pli als standards d'ozendi. Uschia ston quels bajetgs far plazza ad ina nova surbajegiada cun totalmain 154 abitaziuns – da 2.5 fin 6.5 stanzas. Planisà fissi dad avair construì la surbajegiada fin il 2030. Ed en quella duai era il local d'inscunter avair plazza.
Theo Schaub è medemamain in dals suprastants da l'Ambassada Rumantscha. Era sch'el na discurra sez nagin rumantsch, vul el tuttina gugent pussibilitar a la Rumantschia da crear in lieu da sentupada en la citad gronda da Turitg.
Jau hai constatà che las Rumantschas ed ils Rumantschs n'han betg in lieu d'inscunter cuminaivel. Quai che manca ad els è ina segunda patria qua a Turitg.
Las abitaziuns bajegia l'impressari turitgais uschia ni uschia. Ma el – sco era l'Ambassada Rumantscha – avessan grond plaschair sche las abitaziuns vegnissan emplenidas cun persunas rumantschas u che han in connex cun il rumantsch. Uschia pudessi dar in pitschen quartier rumantsch en la citad gronda.
Quai dat forsa in pitschen, pitschen, pitschen vitg amez Turitg.
E co duai quai propi funcziunar? La cooperativa vegn a publitgar ils inserats per las abitaziuns en in'emprima fasa mo per rumantsch e quai en collavuraziun cun l'Ambassada Rumantscha. Uschia duai la populaziun rumantscha en la Bassa survegnir la pussaivladad da s'annunziar pli baud ed uschia avair pli grondas schanzas sin in'abitaziun. Tgi che ha interess vid ina da las avdanzas, po uss gia scriver quai qua.
Datti in basegn?
Tenor la suprastanza da l'uniun saja l'interess per in tal project grond. Il lieu da sentupada sco era las abitaziuns favuraivlas da la cooperativa sajan in basegn tar la populaziun rumantscha a Turitg.
Jau n'hai betg gì quella pussaivladad avant 45 onns, cura che jau sun vegnì a Turitg. Jau sun segir, sche jau avess gì ella, avess jau nizzegià ella. Ed jau sun segir ch'i dat blers giuvens e bleras giuvnas che tschertgan forsa ina dimora – sco student ni era famiglias. Qua pudain nus porscher insatge.
L'emprim pass per in lieu d'inscunter per Rumantschas e Rumantschs a Turitg è fatg cun la fundaziun da l'Ambassada Rumantscha – ed uschia er per in vitget Rumantsch en la citad gronda.