Radund 170 ambassadas, consultats e represchentaziuns pitschnas ha la Svizra sin l'entir mund. Cumpareglià cun auters pajais ha la Svizra uschia ina rait da represchentaziuns fitg stretga en l'exteriur. Gist durant il temp da crisa da corona saja sa mussà, che questa rait stretga saja sa cumprovada, scriva il Cussegl federal en ses rapport da politica exteriura.
Perquai reagescha la Confederaziun uss cun in schlargiament. Sin dumonda da Radio SRF scriva il Departament federal d'affars exteriurs (EDA), ch'i saja planisà da spustar durant ils proxims quatter onns 35 plazzas da lavur da la centrala da l'EDA en la rait da l'exteriur. En l'entir mund ed en la centrala da l'EDA lavuran actualmain var 6'000 impiegads.
Las represchentaziuns da la Svizra en l'exteriur sajan sa cumprovadas durant la crisa da corona, cur ch'i saja ì per repatriar divers abitants da la Svizra la primavaira passada. Ma er sch'i giaja per agid umanitar, nua che las consequenzas da la pandemia sajan fitg grevas, sajan las represchentaziuns svizras al lieu in bun agid, argumentescha il departament.
