Siglir tar il cuntegn

Header

cuntegn

Analisa d'elecziuns La vieuta en direcziun verd-sanester è restada incumpletta

Suenter las ultimas elecziuns federalas han cunzunt ils verds ed ils verd-liberals gudagnà sezs en il parlament. Uschia han els procurà per ina clera maioritad dal center sanester en il Cussegl naziunal.

In'analisa da votaziuns da la «SonntagsZeitung» mussa dentant ch'ils spustament a sanestra è restà incumplet. Bain hajan la Partida socialdemocratica (PS) e la Verda gudagnà passa 60% dapli votaziuns ch'anc durant la legislatura avant. Tuttina saja quai damain ch'il resultat da las elecziuns federalas avess pussibilità.

La raschun: La Partida verd-liberala (PVL) e l'Allianza dal Center (AdC) sa collian anc adina pli gugent cun la Partida liberaldemocratica (PLD) e la Partida populara svizra (PPS) che cun la PS e la Verda. Cun quai saja il center dretg restà la colliaziun dominanta en il Cussegl naziunal. Il parlament n'è uschia betg vegnì pli sanester, ma pli progressiv en dumondas da la politica d'ambient.

Las grondas victuras èn las partidas dal center

La SonntagsZeitung ha analisà las radund 4'500 votaziuns fatgas durant la legislatura currenta dapi il 2019 ed er cumpareglià questas datas cun la legislatura passada dal 2015 fin il 2019. Las cifras mussan che PS e Verda han pudì augmentar il dumber da votaziuns gudagnadas. Tranter il 2015 fin il 2019 han ellas gudagnà 52% da las votaziuns. Durant la legislatura actuala ha la PS gudagnà 65% e la Verda 63% da lur votaziuns.

Las grondas victuras sa chattan dentant en il center. PVL ed AdC han pudì augmentar lur quota da success da 78% e 90%, ch'era pia uschè u uschia gia auta. Sch'ins contempla las votaziuns gudagnadas, giascha questa quota da success uss tar 96% (AdC) e 91% (PVL). Quests success han els cunzunt pudì engraziar a la collavuraziun cun PPS e PLD. Anc adina gudognan las coaliziuns tranter center e dretga las pli bleras votaziun.

PVL è la partida che n'ademplescha betg las spetgas

La finala ha la sanestra ed ils verds stuì constatar ch'ellas survegnan be sustegn da la PVL e dal center en dumondas da l'ambient, energia e societad, sco er en dumondas da la politica da l'exteriur. En dumondas economicas, da finanzas e dumondas socialas han uschè bain il center sco er la PVL politisà da vart dretga. Suenter ch'ellas eran pli baud cura ch'i gieva per dumondas da l'AVS cleramain da vart sanestra, han ellas sustegnì las novas refurmas encunter l'opiniun da la sanestra. Quai er tar la refurma da las cassas da pensiun.

Ampla procura per parlament pli progressiv

In zic meglra vegn la bilantscha entras la renaschentscha da la coaliziun d'ampla (sco en Germania: PLD, PS e Verda). Pli savens ch'anc avant quatter onns, hai dà cooperaziuns tranter la PS, la Verda e la PVL ensemen cun la PLD. En questa cumbinaziun ha la PS pudì festivar intgin success. Uschia ha ella dumagnà tras mesiras pli fermas per la protecziun da la biodiversitad u er d'incumbensar il Cussegl federal da realisar la taglia individuala. Sco facit tira la SonntagsZeitung che las ultimas votaziuns n'han bain betg fatg pli sanester il parlament, ma el è vegnì pli progressiv en dumondas da la societad e da l'ambient.

L'unda verda da las ultimas elecziuns haja er procurà per dapli prontadad per cumpromiss tar las partidas burgaisas. Quai mussia il fatg ch'in bun tant dapli votaziuns sajan vegnidas fatgas entras coaliziuns grondas, sur l'entir parlament, cumpareglià cun la perioda d'avant quatter onns.

La PPS è isolada – ma betg uschè ferma sco Marco Chiesa pretendia

Pli savens hai er dà decisiuns en ina coaliziun da tuttas partidas encunter la PPS. I guardia or uschia sco sche la partida haja anc rinforzà sia politica d'opposiziun suenter l'onn 2019. D'ina isolaziun totala, sco quai ch'il president da la partida, Marco Chiesa discurra savens, na possian ins dentant betg partir.

Las cifras mussan che la PPS ha per gronda part fatg naufragi cun sias dumondas da detagls tar fatschentas. La quota da success è sa sminuida cumpareglià cun la legislatura avant da 65% sin 53%. La Partida populara ha dentant tanta influenza, che bleras fatschentas èn la finala tuttina idas a fin a moda acceptabla per ella. Uschia ha la partida pudì augmentar la quota da success tar las votaziuns finalas, da radund 52% sin 56%. Tar dumondas da la politica da l'exteriur, l'energia e la politica d'asil stat la PPS dentant fitg savens isolada a l'ur dal parlament.

RTR novitads 12:00

Artitgels legids il pli savens