Las mesiras per la protecziun dals flums e dals lais ch’èn vegnidas realisadas mussan effects locals, uschia l'Uffizi federal d'ambient. I dovria dentant vinavant gronds sforzs per che la biodiversitad en ed enturn las auas svizras sa reduceschia betg vinavant e per che flums e lais possian resister a la midada dal clima.
Grazia a las investiziuns en la drenascha e la serenaziun arriva mo pli ina pitschna part da las contaminaziuns dals territoris d’abitadi en ils lais ed ils flums. Dapi ils onns 80 sa reduceschan las concentraziuns da fosfor ed i po vegnir bagnà quasi dapertut. Intginas sereneras vegnan equipadas dapi il 2016 cun megliers indrizs per reducir microcontaminaziuns e restanzas da medicaments ord auas persas.
Dapi il 2011 vegnan revitalisads auals, flums e lais. Uschia survegnan els dapli spazi e rempars vegnan allontanads. Las consequenzas negativas da l’utilisaziun da la forza idraulica vegnan sminuidas cun mitigiar la fluctuaziun artifiziala da la deflussiun e cun bajegiar barrieras d’ovras electricas cun stgalas per peschs.
Flums, auals e lais èn er centrals per il mantegniment da la biodiversitad. I dovria perquai ulteriurs sforzs per puspè furmar a moda natirala l’entir sistem da las auas, hai num en il rapport.
Contaminaziun tras pesticids
En blers lieus n’ademplescha la qualitad da l’aua dentant betg las pretensiuns legalas minimalas. Oravant tut pesticids da l’agricultura contaminescha auals e flums da la Bassa. L’aua sutterrana cuntegna nitrat e products da decumposiziun da pesticids. Perquai è l’utilisaziun da l’aua per baiver limitada.
Intgins lais ed auas currentas cuntegnan vinavant memia bler fosfor e nitrogen. En consequenza è la concentraziun d’oxigen en divers lais cleramain memia bassa, uschia ch’ils peschs e las plantas moran. Tras ils flums arrivan ultra da quai grondas quantitads da nitrogen da la Svizra en la mar. Il parlament ha perquai surdà il 2021 a la Confederaziun l’incumbensa da procurar che las sereneras allontaneschian en l’avegnir anc dapli nitrogen ord auas persas.
