Siglir tar il cuntegn

Header

audio
Analisa dad Adrian Camartin
Or da Actualitad dals 25.09.2022.
laschar ir. Durada: 3 minutas 41 Secundas.
cuntegn

Analisa Ussa vali da tegnair las empermischuns

Duas raschuns han manà al gea a la revisiun da l’AVS:

Per ina gronda part da la populaziun èsi cler che l’AVS sto vegnir refurmada. Dapi l’ultima refurma substanziala è passà passa in quart tschientaner. Il squitsch dad ussa far in pass e dad almain segirar las finanzas enfin la fin da quest decenni era grond. Adina dapli persunas vegnan pensiunadas, da l’autra vart datti pli paucas persunas che pajan contribuziuns. La proposta uss acceptada augmenta las entradas cun augmentar la taglia sin la plivalur, il medem mument vegn spargnà cun trametter las dunnas in onn pli tard en pensiun.

Da l’autra vart ha l’argument da la sanestra e dals sindicats betg chattà avunda sustegn tar votantas ed cunzunt betg tar votants. Numnadamain che l'egualitad n’è betg stgaffida cun trametter umens e dunnas cun 65 onns en pensiun, mabain ch’i dovra en emprima lingia dapli gistadad tar las pajas ed uschia er tar il provediment per la vegliadetgna da las dunnas. Segir ha era l’empermischun dals burgais e da l’economia - ch'ins vegnia a megliurar la situaziun da las dunnas en la revisiun pendenta da la segunda pitga, la cassa da pensiun - ad avair gì effect.

Gist perquai èsi ussa impurtant ch'i suondan uss a quell’empermischun era pass concrets a favur da las dunnas e da tuttas persunas che lavuran parzial u fadian pauc. Uschiglio ristga la maioritad burgaisa en il Parlament federal che quell'impurtanta segunda revisiun dal sistem per il provediment per la vegliadetgna fa naufragi a l’urna. 

Adrian Camartin

Adrian Camartin

Correspundent Chasa federala

Avrir la boxa da profil Serrar la boxa da profil

Adrian Camartin rapporta per RTR da Berna. Sco correspundent persequitescha el la politica naziunala, quai vul dir decisiuns dal Cussegl federal e debattas dal Parlament federal. El rapporta dentant era en general da temas svizzers ed en spezial dals Rumantschs en la Bassa.

RTR actualitad 17:00

Artitgels legids il pli savens