Anc nagin cumpromiss tar taglia per interpresas

La lutga per la lescha davart la refurma da l'imposiziun da taglia sin interpresas 3 cuntinuescha. Suenter il Cussegl dals chantuns l’emna passada, ha il Cussegl naziunal puspè tractà la fatschenta il glindesdi saira.

Cussegliera naziunala Magdalena Martullo-Blocher. Bild in Lightbox öffnen.

Legenda da maletgs: Magdalena Martullo-Blocher s’exprima davart la refurma da la taglia per interpresas. Keystone

Malgrà che la chombra gronda ha en intgins puncts dà suenter al Cussegl dals chantuns, in cumpromiss n’è anc adina betg sin maisa. Il Cussegl naziunal vul vinavant ch'interpresas astgan trair giu da lur gudogn in tschains fictiv sin l’agen chapital. Persuenter na vul la chombra gronda betg ch'ils chantuns pon salvar ina cumpart pli gronda da la taglia federala directa.

En blers auters puncts sajan els dentant suandads a la chombra pitschna, di Magdalena Martullo-Blocher da la PPS che sesa ella cumissiun per economia e taxas da la chombra gronda. Ussa stoppia lezza far in pass.

Ils chantuns fan pressiun

Gia la gievgia tracta il Cussegl dals chantuns puspè la lescha. Per Martin Schmid da la PLD, il president da la cumissiun per economia e taxas da la chombra pitschna, ina fasa decisiva en l'entira debatta.

Clar è per el ch'il Cussegl naziunal stoppia la fin finala acceptar ch'ils chantuns duain survegnir dapli daners da la taglia federala directa. Mo uschia sustegnian lez la refurma. Il parlament na dastgi betg emblidar ch'ins porti era responsabladad per la plazza economica svizra e stoppia era resguardar las resalvas e temas che la populaziun haja vers la refurma.

Anc grondas differenzas

In pussaivel cumpromiss è per Martin Schmid da prender viadora il tschains fictiv sin agen chapital, e da metter quella part en ina lescha separada che vegniss tractada pli tard el parlament.

Nagina chapientscha per quella proposta ha Magdalena Martullo-Blocher. Las societads da holding sajan fitg mobilas e possian fitg spert midar lur sedia en l’exteriur. Perquai dovri immediat ina schliaziun per quellas.

Malgrà las differenzas, tant Martullo-Blocher sco era Schmid èn persvadids da chattar in cumpromiss ils proxims dis. In naufragi mettess en privel las finanzas da la Confederaziun, dals chantuns e da vischnancas, e periclitass bleras plazzas da lavur.