Il president da Hotelleriesuisse, Andreas Züllig vul ch'ils meds da promoziun da la Confederaziun vegnan repartids be pli sin grondas regiuns economicas. Las pitschnas hajan lura da sa drizzar envers las grondas. Be uschè sappian ins «sfurzar» las regiuns da cooperar meglier ed uschè tegnair pitg a las sfidas che spetgian regiuns muntagnardas en il futur.Tenor Züllig pateschian surtut trais secturs:
- energia
- construcziun
- turissem
L'economia d'energia na possia betg pli gestiunar la forza idraulica, en mintga cas betg cun purtar ils custs. L'economia da construcziun vegnia limitada tras la realisaziun da l'iniziativa cunter abitaziuns secundaras ed il turissem pateschia dal ferm franc svizzer. Ultra da quai dettia er en l'agricultura midadas da structuras.
Malgist ubain tuttina ina bun'idea?
Cler, i saja delicat da far uschè ina pretensiun, admetta Andreas Züllig. Dentant la nova legislatura a Berna cumenzia il 2020 ed uss saja il dretg mument per lantschar la discussiun. «I na fa simplamain nagin senn cha mintga regiun cuschinia sia atgna suppa».
Er president da Hotelleriesuisse Grischun vesa avantatgs
Ernst Wyrsch, il president da Hotelleriesuisse Grischun sustegna da principi il plan da Züllig. El porta in exempel: Lai ed Arosa sajan uss vid planisar da lavurar ensemen cun la Val d'Alvra. «Persula n'avess la Val d'Alvra betg tantas schanzas sco cun il budget e cun il num da Lai ed Arosa», argumentescha Wyrsch.
RR novitads 10:00