La directura da l'Uffizi federal da sanadad, Anne Lévy è dentant sa mussada plain speranza en in'intervista cun il «SonntagsBlick». I giaja il mument en la dretga direcziun. Ed i vesia or suenter ina midada da trend. Perquai saja ella precaut optimistica.
Questa valitaziun vegn sustegnida da la cifra da reproducziun R. Las pli novas valurs publitgadas da l'ETH Turitg mussian, che a valur R giaschai uss en media tar 0,78. En il vest da la Svizra saja la valur perfin lunsch sut questa valur.
Il medem mument ha la directura dentant refusà la renfatscha che la Svizra saja stada preparada memia mal per la segunda unda. Ins haja savì ch'i vegnia ina segunda unda ed er che quella vegnia ad esser pli extrema che l'emprima.
Surprais da la dimensiun
La segunda unda na saja betg vegnida a moda suprendenta en Svizra. La stad hajan ils chantuns bajegià or lur contact tracing sco era las capacitads per testar. Nagin haja dentant quintà ch'il dumber da cas vegnia a s'augmentar uschè svelt. I saja stà legitim da lubir per la stad in scenari positiv, ha er confermà Lukas Engelberger, president da la Conferenza svizra da las directuras e dals directurs chantunals da sanadad, en in'intervista cun la Sonntagszeitung.
Cuntradictoric è stà d'udir questa fin d'emna da l'epidemiologa Emma Hodcroft da l'Universitad Berna e David Nabarro, l'incumbensà spezial da l'Organisaziun mundiala da sanadad WHO. Hodcroft ha ditg a la gasetta «Le Matin Dimanche» ch'il dumber da cas che ha puspè cumenzà a crescher il zercladur e fanadur avess stuì alarmar.
Nabarro ha declerà en in'intervista cun CH Media che las autoritads svizras hajan manchentà da construir l'infrastructura necessaria durant la stad, suenter che l'emprima unda era sut controlla. La consequenza saja la segunda unda. Sch'i na vegnia betg agì ussa, dettia l'entschatta dal 2021 la terza unda. Ils pajais en l'ost da l'Asia hajan mussà co i saja da far: Sch'ins haja dumagnà giu il dumber d'infecziuns durant la stad, na sajan las mesiras betg da schluccar. Ins duai spetgar enfin che las cifras sajan bassas e restian bassas, uschia Navarro. Sco emprim stoppian ins esser preparà per franar erupziuns futuras.
