A chaschun dal 200avel anniversari da Gottfried Keller vegn surdà quest onn gist duas giadas il premi. Thomas Hürlimann ed Adolf Muschg survegnan il premi Gottfried Keller 2019 ch'è dotà cun 25'000 francs.
Sco quai che la fundaziun che surdat il premi scriva, vegnian onurads dus auturs svizzers che hajan en lur ovras ina relaziun centrala cun Keller. Tant Hürlimann sco Muschg hajan fatg quellas relaziuns en agens tocs da teater.
«Das Lied der Heimat» e «Kellers Abend»
Cun il toc da teater «Das Lied der Heimat» ha Thomas Hürlimann inscenà il 1998 la fugia da Gottfried Keller da las festivitads per ses 70avel anniversari. Adolf Muschg da l'autra vart ha il 1975 cun il toc da teater «Kellers Abend» mess in monument a Keller. Il toc tracta la saira avant che Keller è vegnì instituziunalisà en l'uffizi sco chancelier.
La surdada dal premi a Hürlimann e Muschg ha lieu ils 7 da settember.
RR novitads 20:00