Siglir tar il cuntegn

Header

Ina petta cun scrit si "Blick"
Legenda: Spretschada da blers e legida da passa 400'000 lecturs - la gasetta da boulevard svizra festivescha anniversari. montascha RTR
cuntegn

Anniversari dal Blick La gasetta cun ils pli blers lecturs - malgrà spretsch e critica

Oz avant 60 onns è cumparì per l’emprima giada il Blick. In exemplar custava da lez temp 20 raps.

La gasetta da boulevard è adina fruntada sin critica – pervi da ses stil ed il focus sin sport, sensaziun u era sex. Cunzunt ils emprims onns nagin che avess cartì che la gasetta fetschia strada.

Entschatta turbulenta

L’ediziun giubilara dal Blick descriva l’entschatta: En ils onns sessanta aveva in cusseglier naziunal pretendì da scumandar quest stil d’infurmaziun.

Il Cussegl federal aveva respundì en tun deplorond, ch’i na dettia nagina lescha per scumandar la pressa da sensaziuns. Enstagl ha il Cussegl federal lura scumandà a l’administraziun federala da discurrer cun schurnalists dal Blick.

Anc adina la ferma gasetta

Tuttina è il Blick svelt daventà la pli gronda gasetta en Svizra. La pli auta derasaziun ha la gasetta da la chasa editura Ringier cuntanschì il 1986 cun 380'000 exemplars.

Sco tut tschellas gasettas ha er il Blick da sbatter oz encunter la digren da lecturs. Ma ella resta – tenor l’organisaziun da retschertga da medias WEMF - cun 107'000 exemplars anc adina la pli ferma gasetta «betg gratuita» e cuntanscha mintga di passa 400'000 lecturs.

RR actualitad 07:00