Il politicher da la PCD, Flavio Cotti, è vegnì elegì il 1986 en il Cussegl federal sco successur dad Alphons Egli. Durant ses 12 onns sco cusseglier federal ha Cotti l'emprim manà il Departament da l'intern e pli tard lura quel da l'exteriur. Durant ses temp d'uffizi è Cotti stà duas giadas president da la Confederaziun – quai il 1991 e 1998.
Sco minister da l'exteriur ha il Tessinais rinforzà la posiziun internaziunala da la Svizra e promovì ina politica da l'avertura. Il punct culminant da sia carriera è stà il 1966, cura ch'el ha presidià la OSCE, l'Organisaziun per segirtad e collavuraziun en l'Europa. In impurtant success politic da Cotti è stada la cunvegna bilaterala cun l'Uniun europeica. Cotti è adina stà cun persvasiun davos al finamira strategica da far part da l'UE.