Siglir tar il cuntegn

Header

cuntegn

Svizra Anteriur derschader federal maina procedura cunter AutoDaPosta SA

Hans Mathys, l'anteriur derschader federal, maina la procedura penala administrativa cunter l'AutoDaPosta SA. Ses substitut daventa il derschader dal chantun Neuschatel, Pierre Cornu. Quai ha communitgà l’Uffizi federal da polizia Fedpol.

La procedura saja averta ed i valia la presumziun d’innocenza. Ins saja vid persequitar ulteriuras perscrutaziuns ed examinaziuns dad autras autoritads ed organs, ha Fedpol scrit. I na saja betg pussibel da dir quant ditg che la procedura vegnia a durar. Quai dependia da quai ch'ins chattia en las retschertgas dad uss. Tut tenor resultats possia perfin durar onns enfin ina decisiun definitiva e valaivla.

Cussegl federal ha incumbensà Fedpol

La fin da favrer aveva il Cussegl federal dà a Fedpol l’incumbensa d'investigar en connex cun las irregularitads tar la AutoDaPosta SA. L'Uffizi federal da traffic aveva constatà tar ina revisiun che l'AutoDaPosta SA aveva dapi il 2007 fatg gudogns en il traffic public regiunal subvenziunà e scrit enturn quels gudogns en auters champs, tranter il 2007 ed il 2015. Per quels onns sto l'AutoDaPosta SA pajar enavos radund 78 milliuns francs.

RR novitads 12:00

Artitgels legids il pli savens