- L'anteriur directur da la Televisiun Svizra tudestga Peter Schellenberg è mort en la vegliadetgna da 81 onns.
- Davent dal 1988 ha il Turitgais manà durant 16 onns l’interpresa – uschè ditg sco nagin auter da ses antecessurs.
- Schellenberg ha modernisà en ses temp d’uffizi il program, ed era la Rumantschia ha profità.
Blers onns aveva Peter Schellenberg lavurà sco schurnalist da televisiun e sco moderatur. Lura è el daventà per pulita surpraisa il 1988 nov schef da la Televisiun Svizra tudestga.
En ils 16 onns d’uffizi ha Schellenberg transfurmà SF DRS sco paucs auters da ses antecessurs. Sut sia direcziun èn naschidas emissiuns sco «10 vor 10» e «Lüthi und Blanc». Era la «Sternstunde Philosophie» è vegnida introducida en quest temp. Successura da Schellenberg sco scheffa da la televisiun è daventada il 2004 Ingrid Deltenre.
Televisiun Rumantscha ha era profità
Era per la Rumantschia è il temp d'uffizi da Peter Schellenberg stà fritgaivel. Uschia hai dà dapli emissiuns da Telesguard – e quai amez il program da la saira a las 18.50 durant sis minutas.