Siglir tar il cuntegn

Svizra AP22+: Visiuns dal Cussegl federal grittenteschan purs

Il Cussegl federal ha oz procurà per chaus cotschens tar ils purs. La visiun dal Cussegl federal per sviluppar enavant la politica agrara na persvada betg ils purs.

Legende: Audio AP22+: Visiuns dal Cussegl federal grittenteschan purs abspielen.
2:38 min, Actualitad dals 01.11.2017.

A media vista vul il Cussegl federal colliar meglier las fieras agraras naziunalas ed las internaziunalas. Quai gidia a la segirezza alimentara ed ina restricziun da la duana saja favuraivel per l'economia, scriva il Cussegl federal.

Jau sun superbi da l'agricultura svizzera e vul manar inavant quella sin la prima plazza.
Autur: Johann Schneider-AmmannCusseglier federal e minister d'economia

Plinavant saja ina pli pac rigida protecziun dals cunfins supportabla per ils purs, sche els vegnissan sustegnì adatta.

Ils paurs svizzers perincunter èn segirs che ina tala reducziun da la duana fa mo donn a als purs sco era a la populaziun.

Quella visiun po il Cussegl federal bittar en il chanaster. Quella na vaglia nagut!
Autur: Markus RitterPresident dals purs svizzers

Ils purs na sajan betg pronts da discurrer sur da talas visiun di il president dals purs svizzers Markus Ritter.

La vista generala dal Cussegl federal

Per la politica agrara a partir dal 2022 PA22+ propona il Cussegl federal ina strategia da duas cumponentas: Manaschis svizzers duajan survegnir dapli perspectivas, e fieras agraras naziunalas ed internaziunalas duajan vegnir colliadas meglier en il rom da cunvegnas da commerzi.

Acturs da l'agricultura e da l'economia alimentara duajan survegnir dapli perspectivas sin il martgà, en lur manaschis e pertutgant resursas natiralas. Uschia scriva l'Uffizi federal d'agricultura (UFAG).

Il Departament federal d'economia, furmaziun e retschertga (DEFR) vegn uss a formular in document da discussiun per concretisar la direcziun.

RR novitads 15:00