Per exempel ha l’apoteca da l'armada impundì 29 milliuns francs per tests da corona, e 16 milliuns francs per mascrinas da FFP2. Las cumpras da l’apoteca da l’armada cuntinueschan. Il martgà mundial per il material impurtant en connex cun la pandemia saja sa quietà fermamain, hai num en il rapport. Perquai succedian las cumpras uss puspè via ils furniturs spezialisads en Svizra.
Custs da passa 13 milliuns francs han chaschunà a l’apoteca il magasinar ed il transport dals vaccins. Ella ha stuì cumprar frestgeras spezialas per ils vaccins, ed ulteriurs magasins endrizzads. E per transportar ils vaccins hai per exempel duvrà chistas e glatsch setg. Quant ch’ils vaccins sezs han custà n’è anc betg enconuschent. L’Uffizi federal da sanadad BAG vul publitgar ils contracts da cumpra il pli tard fin la fin dal zercladur 2022. Lura saja la cumpra da vaccins per il 2023 terminada.
