Siglir tar il cuntegn
cuntegn

Svizra App per votaziuns - VoteInfo

La Confederaziun ed ils chantuns han lantschà ina nova app per las votaziuns. La app «VoteInfo» duai furnir infurmaziuns davart ils singuls projects e actualisar permanentamain ils resultats da las votaziuns. La app cuntegna era tut las infurmaziuns davart las votaziuns chantunalas.

La app VoteInfo sin in telefonin.
Legenda: VoteInfo porscha dasper las infurmaziuns dal carnet da votaziuns era anc videos explicativs. Adrian Camartin RTR

Ella preschenta a las dumengias da votaziun a partir da las 12.00 permanentamain resultats actualisads da las votaziuns naziunalas e chantunalas. Cun l'app survegnan las votantas ed ils votants svizzers in nov access mobil a las infurmaziuns uffizialas davart las votaziuns federalas e chantunalas. Sin lur smartphone chattan ellas ed els – ultra dals resultats da las votaziuns – er explicaziuns tar tut ils projects naziunals e chantunals. «VoteInfo» è online a partir d'immediat e cuntegna las explicaziuns tar la votaziun dals 10 da favrer 2019.

Mobil, persunalisà ed activ

Ultra da l'access mobil a tut las infurmaziuns uffizialas davart las votaziuns federalas e chantunalas, porscha «VoteInfo» la pussaivladad drizzar en las explicaziuns ed ils resultats or dals chantuns sco favurits tenor interess persunals. Las utilisadras ed ils utilisaders pon abunar messadis push. Quellas rendan attent a novas infos, a videos u a resultats finals. Las votantas ed ils votants pon er laschar sa regurdar ch'els possian anc ir a votar.

Resultats sco open-government-data

Cun lantschar l'app han la confederaziun ed ils chantuns er concepì da nov en reguard tecnic ed organisatoric la transmissiun dals resultats e l'eruida dals resultats provisorics da las votaziuns. Tut ils resultats vegnan publitgads permanentamain a partir da las 12.00 sin www.opendata.swiss, il link avra en ina nova fanestra sco open-government-data. Els stattan directamain a disposiziun a las medias ed a la publicitad sco datas legiblas da maschinas.

RR novitads 18:00