En ina crisa sco uss saja impurtant da tgirar il dialog, e da promover il chit naziunal, ha ditg Guy Parmelin a chaschun da sia visita tar la regenza tessinaisa. En ses pled a Lugano ha il president da la Confederaziun lantschà in appel a tut il chantuns – da suandar l'exempel dal Tessin e vaccinar. Il Tessin tutga tar ils chantuns cun la megliera quota da vaccinar.
Dar ina perspectiva
A partir da l'avrigl haja la Svizra a disposiziun in cler quantum pli grond da vaccins, ha Guy Parmelin accentuà a Lugano. Tut ils chantuns stoppian esser pronts. I saja fitg impurtant da dar a la populaziun ina perspectiva. La glieud saja stancla ed haja adina dapli fadia da suandar las mesiras.
Vitiers ha il president da la Confederaziun ditg sin dumonda – che persunas na duain betg vegnir discriminadas, sch'ellas refusian ina vacczinaziun. I saja dentant imaginabel, che persunas betg vaccinadas stoppian preschentar in test svelt negativ per concerts u viadis.