Cuntenta è l'uniun ch'ils blers elavurants da latg han reducì lur deducziuns e pajan uschia in pretsch in pau pli aut per il latg. Dals quatter pli impurtants elavurants da latg hajan uss trais reducì las deducziuns, scriva l’Uniun purila. Betg uschè bain vesì ora là, nua ch'i va per tegnair en ils pretschs directivs. Qua pajan trais da quatter dals gronds elavurants anc adina in pretsch net che saja sut il pretsch regulativ.
Purs vendan latg sut il pretsch da producziun
Ils purs stoppian anc adina vender il latg sut ils custs da producziun, ha ditg il president da l'Uniun purila svizra Markus Ritter. L’uniun pretenda ina cumpart faira vid la valurisaziun.
Consuments decidan
Sur la stad vul uss l’Uniun purila svizra augmentar sia preschientscha en las medias e purtar exempels concrets da famiglias da purs che pateschan sut il pretsch bass da latg. La finamira saja da sensibilisar il consument. Ma era ils purs da latg stoppian sez mussar responsabladad e per exempel avant ina investiziun pli gronda far propi ponderaziuns, ha accentuà Ritter. El mender cas stoppian els bandunar la branscha da latg. Quai na saja betg simpel, perquai che blers purs hajan gia fatg investiziuns ed ils blers hajan simplamain grond plaschair da tegnair vatgas da latg, ha accentuà Ritter.
RR novitads 15:00