Daniel Fässler ch’è stà fin qua mastral e cusseglier naziunal è vegnì elegì cun in grond surpli dal cumin. Il giurist da 58 onns tutga sco ses antecessur Ivo Bischofberger tar la Partida cristian-democratica.
Perquai che Fässler vegn saramentà ils trais da zercladur sto el dar giu fin ils dus da zercladur ses post sco cusseglier naziunal. Fin las elecziuns naziunalas posseda il chantun Appenzell Dadens uschia nagin represchentant en la chombra gronda. Il chantun desista sin in'elecziun anticipada.
Segund candidat senza success
Ditg era Fässler il sulet candidat per il Cussegl dals chantuns. Pir trais emnas avant il cumin è Thomas Rechsteiner vegnì proponì sco segund candidat. En l'Appenzell Dadens èsi pussaivel da proponer curt avant u durant il cumin in candidat. Rechsteiner ha dentant gì nagin success.
RR novitads 15:00