Siglir tar il cuntegn

Header

video
Dus giuvens emprendan sez rumantsch
Or da RTR Social dals 08.04.2021.
laschar ir
cuntegn

Applicaziuns digitalas Pertge che dus giuvens da Winterthur emprendan rumantsch

Jeremy Roch e Ignacio Bustamante da Winterthur abiteschan ensemen en la citad veglia da Winterthur. Cunquai ch’els han differents linguatgs mamma – franzos e spagnol – siglian els per discurrer adina d’in linguatg tar l’auter. Uschia èn els sa decidids d’emprender rumantsch sco linguatg communabel.

Dapi l’entschatta da l’onn 2021 emprendan ils dus giuvens autodidacticamain rumantsch sursilvan. La decisiun da tscherner il rumantsch sco linguatg communabel saja stada svelta, declera Jeremy Roch che vegn oriundamain da Genevra. Era per Ignacio Bustamante che deriva da la Bolivia è il rumantsch stà ideal cunquai che blers pleds e la grammatica sumeglian a lur linguatgs mamma.

Uschia han els cumprà divers meds d’instrucziun per emprender autodidacticamain. Da chattar cudeschs da grammatica e carnets d’exercizi na saja betg stà il problem declera Jeremy Roch. Mo cun chattar meds adattads è crudà si ch’i dat strusch ina purschida digitala sco per exempel en furma d’applicaziuns per ils telefonins.

Jeremy Roch durant il tandem da linguas.
Legenda: Jeremy Roch durant il tandem da linguas. RTR, Lukas Quinter
Ils meds n’èn betg adina optimals
Autur: Jeremy Roch

Quai ch’els hajan chattà saja stà u memia avanzà u betg adattà per emprender. Quai saja in zichel donn uschia stoppian els adina runar natiers tut ils cudeschs sch’els vulan emprender.

audio
Dus giuvens a Winterthur emprendan rumantsch
04:11 min, Actualitad dals 08.04.2021.
laschar ir. Durada: 04:11 minutas.

Custs immens

La Lia Rumantscha che s’engascha per la furmaziun dal Rumantsch sa che la digitalisaziun daventa adina pli impurtanta. Uschia han els creà l’applicaziun «Babulins» per IOS ed Android nua che uffants san emprender a moda ludica rumantsch. Fin ussa è «Babulins» vegnida chargiada giu varga 13’000 giadas.

Crear in’app per creschids n’è actualmain betg en discussiun, declera Conradin Klaiss, il responsabel per furmaziun tar la Lia Rumantscha. Ils custs da be mantegnair in’app sajan autas. Igl è regularmain da far updates da l’applicaziun. Uschia che la Lia Rumantscha investescha mintg’onn radund 2’300 francs be per il mantegniment.

RTR actualitad 11:00

Artitgels legids il pli savens

Scrollar a sanestra Scrollar a dretga