Perscrutaders svizzers avevan stgaffi ina massiva culissa da smanatschas avant las decisiuns dal parlament: En il cas ch’ils cussegls n’approvassan betg la libra circulaziun da persunas cun la Croazia pudess la Svizra vegnir excludida ord la «Champions League da la perscrutaziun». Facticamain è la participaziun al program da perscrutaziun «Horizon 2020» colliada formalmain cun il protocol da Croazia.
Fin che l’iniziativa d’immigraziun n’è betg realisada tenor la Constituziun na dastga il Cussegl federal però betg far novs contracts da dretg internaziunal – quai vul il text da l’iniziativa da la PPS. Il problem: Sch’il protocol da Croazia n’è betg ratifitgà fin ils 9 da favrer 2017, lura croda la guillotina per «Horizon 2020».
Il resultat
Suenter il Cussegl naziunal è uss er il Cussegl dals chantuns s’exprimì da schlargiar la libra circulaziun da persunas sin il pli giuven commember da l’UE. La decisiun è crudada cun ina gronda maioritad da 40 cunter 3 vuschs.
La Chombra pitschna oblighescha explicitamain il Cussegl federal da ratifitgar la cunvegna pir cura ch’i dat ina soluziun cun l’UE per la dumonda davart l’immigraziun. Quest pass duai impedir la regenza da far insatge tut suletta. La decisiun è vegnida fatga cun 33 cunter 10 vuschs.
RR novitads 14:00