Siglir tar il cuntegn
Inhalt

Svizra «Arena» cun l'istoricher Ganser n'ha betg cuntrafatg a la lescha

L'emissiun «Arena» davart il tema «Guerra da Trump cunter las medias» n'ha betg surpassà la lescha da radio e televisiun. Quai ha decidì l'Instanza independenta da recurs da radio e televisiun (UBI). Il public haja pudì sa far ina idea tar il tema – malgrà il tractament malgist da Ganser.

Moderatur Jonas Projer e Daniele Ganser vid discutar.
Legenda: Moderatur Jonas Projer (san.) cun ses giast Daniele Ganser durant l'emissiun tant crititgada. SRF

L'Instanza independenta ha decidì quai en ina consultaziun publica.

Decisiun da tagl tras presidi da la UBI

Il gremi n'è betg arriva tar in consens suenter ina discussiun da duas uras. Il presidi aveva en quai cas la vicepresidenta Claudia Schoch che ha stuì far la decisiun da tagl. Il president Vincent Augustin ha stuì s'abstegnair da la vusch perquai ch'el era sez preschent en l'emissiun dals 24 da favrer.

Critica sa drizza cunzunt vers moderatur Projer

Che l'emissiun saja ord perspectiva schurnalistica stada manglusa, da quell'opiniun èn blers commembers dal gremi. Il mediatur da la SRG Roger Blum ha gia ordavant crititgà co il moderatur Jonas Projer ha tractà ses giast Daniele Ganser, istoricher e publicist.

Gronda critica ha chaschunà in mail da Ganser ad in collavuratur da SRF ch'è vegnì mussà durant l'emissiun. Ganser n'era betg vegnì infurmà da quai. Plinavant saja quest mail be vegnì mussà en furma scursanida. Tras quai haja il public survegnì l'impressiun ch'il moderatur Projer veglia discreditar la credibilitad da ses giast, crititgeschan plirs commembers da la UBI.

RR novitads 16:00