La stagiun d’enviern duai cumenzar ils 31 d’october 2021. Per cuntanscher questa finamira lavura l’Arena da skis Andermatt-Sedrun cun duas metodas: cuvrir il glatscher da Gurschen sin 2900 meters ed endrizzar 10 deposits cun naiv en il territori da skis.
200'000 meters cubics naiv en ils deposits
In deposit è 70 meters lungs e var 5 meters lads. En tut cuntegnan els 200’000 meters cubics naiv. La primavaira vegn ella stuschada ensemen, cuverta cun ina folia e fermada cun satgs da sablun ed ina suga. Durant la stad perdan ils deposits 20-30 % dal volumen. E curt avant cumenzar la stagiun d’enviern vegn la naiv rasada ora sin pista.
Bildergalerie
-
Bild 1 von 4. Il schef da communicaziun Stefan Kern ed il manader tecnic Dani Meyer (dretg). Bildquelle: RTR, Hubert Giger.
-
Bild 2 von 4. Vista sin dus deposits en il territori da l'alp Gurschen. Bildquelle: RTR, Hubert Giger.
-
Bild 3 von 4. In deposit da naiv. Bildquelle: RTR, Hubert Giger.
-
Bild 4 von 4. La folia dal glatscher vegn allontanada. Bildquelle: RTR, Hubert Giger.
Cuvert passa 1 hectara
La segunda metoda da conservar naiv è da cuvrir il glatscher da Gurschen sin 2900 meters sur mar. Dapi 2004 vegn el cuverds, a l’entschatta anc sin 2000 meters quadrats. Ils ultims onns hajan els cuvert passa 10’000 meters quadrats, di il manader tecnic Dani Meyer. Uss vegn la folia alva allontanada e rullada ensemen. Quai stoppian els far gia uss per prevegnir, en cas ch’i navess. Alura na fissi quasi betg pli pussaivel d’allontanar la folia, di il manader tecnic.
L’avantatg da questas duas metodas è che l’Arena da skis Andermatt-Sedrun po cumenzar ad uras la stagiun d’enviern, ch’ella po spargnar custs e producir pli pauc naiv artifiziala.