Siglir tar il cuntegn

Header

cuntegn

Armada Commando spezial per cumbatter criminalitad da cyber

Il Cussegl federal vul stgaffir sin l'entschatta da l'onn proxim ina nova unitad speziala militara per cumbatter attatgas da cyber. El ha approvà in project correspundent per mauns dal parlament.

Legenda: Viola Amherd, cussegliera federala e parsura dal Departament federal da defensiun, protecziun da la populaziun e sport durant la conferenza da pressa cun il schef d'armada Thomas Süssli. Keystone

L'impuls da rinforzar la defensiun d'attatgas da cyber era vegnì dal parlament sez il 2018. En la consultaziun èn ils plans dal Cussegl federal vegnids beneventads. Il dumber da la milissa en quest sectur duai vegnir augmentà davent da radund 200 sin 575 commembers da l'armada. La refurma duai esser terminada il 2024.

Enfin uss è il focus da la protecziun encunter attatgas da cyber stada sin ils chanals da communicaziun dal militar ed ils indrizs. La nova truppa duai esser abla da sustegnair a moda subsidiara er infrastructuras criticas e firmas privatas tar la protecziun. Tar questas infrastructuras criticas tutgan tranter auter er las raits d'electricitad, las Viafiers federalas e las firmas da telecommunicaziun.

Previs èsi da furmar fin il prim da schaner 2022 in battagliun ed in stab professiunal. Tenor il schef da l'armada, Thomas Süssli vegnia dentant anc a cuzzar in temp enfin che l'alimentaziun da questa truppa è d'auzada sin 575 persunas.

RTR novitads 16:00

Artitgels legids il pli savens

Scrollar a sanestra Scrollar a dretga