Siglir tar il cuntegn

Header

cuntegn

Armada Mo pli decisiuns strategicas

Il Parlament federal na duai betg pli discutar davart il model dals stivals per ils schuldads, ni davart il dumber da novs chars armads.

Quai tenor il rapport che la cussegliera federala Viola Amherd ha preschentà il glindesdi a Berna. Cun la midada vul ella meglierar ils process per cumprar material d’armament.

Ozendi preschenta il Cussegl federal mintg'onn al Parlament federal in messadi da l'armada. Là preschenta el il material d'armament ch'el vul cumprar ensemen cun la dumonda per il credit correspundent. Ils ultims onns han ils parlamentaris uschia gì da decider davart novas monduras ni novs bastiments da patruglia. Quai saja pauc effizient, ha ditg la ministra da defensiun Viola Amherd.

Dapli effizienza e flexibilitad

En il futur duai il Parlament federal perquai decider mintga quatter onns, en tge direcziun che l'armada duai sa sviluppar e nua ch'ella duai investir daners per cuntanscher tschertas abilitads. Il Cussegl federal duai lura decider en atgna cumpetenza tge che sto vegnir cumprà per ademplir las finamiras dal parlament.

La midada rinforzia la rolla dal Parlament federal sin nivel strategic da l'armada, ha cussegliera federala Viola Amherd accentuà. La controlla saja vinavant pussaivla. I dettia duas giadas per onn in rapport davart il svilup da las acquisiziuns, ed a chaschun da la debatta da budget possia il parlament intervegnir en chaussa. Enfin en dus onns spera Amherd da pudair realisar ils novs process.

audio
Per tadlar curt e cumpact
ord RTR Audio dals 15.06.2020. Maletg: Keystone
laschar ir. Durada: 1 minuta 12 Secundas.

RTR novitads 17:00

Artitgels legids il pli savens