Gia per proxim venderdi ha la cumissiun uss envidà represchentants da la branscha per discurs, ha ditg Isidor Baumann il president da la cumissiun per la politica da segirezza dal cussegl dals chantuns, en ina intervista cun las gasettas «Tages Anzeiger» e «Der Bund». Las interpresas che fan la dumonda n’ha Baumann betg vulì numnar, tenor las duas gasettas sa tractia quai da 13 interpresas tranter quellas era l’interpresa d’armament ch’appartegn a la Confederaziun, «Ruag».
Argument da plazzas da lavur
L'industria d'armament argumentescha cun ina situaziun precara economica. L'existenza da la l'industria tecnica d'armament cun millis da plazzas da lavur, saja periclitada a moda acuta. Ils exports d'armament sajan sa sminuids fermamain suenter in punct culminant il 2011. In motiv per la sminuziun saja la pratica da concessiuns dal cussegl federal, uschia vegnia argumentà di Baumann.
Quella pratica saja bler pli restrictiva che quella da l'Uniun europeica. Là possian las firmas era exportar en stadis nua ch'i dettia in conflict armà intern, pia ina guerra civila. Pajais na vegnian dentant betg numnads. Il «Tages Anzeiger» e «Der Bund» numnia dentant Katar, la Jordania e Pakistan.
GSoA discurra da vender armas a terrorists
La gruppa, «Schweiz ohne Armee» ha avertì da schluccar las restricziuns per exports. Da vender armas er en pajais cun guerras civilas saja in ristg che armas svizras pudessan sa tschentar en mauns da gruppas terroristicas. Quai scriva la GSoA en ina communicaziun.
Tancs da Mowag tar Boko Haram, granatas da maun da Ruag en mauns d'in attentader dal SI, muniziun svizzra en il conflict en Siria.
In export d'armas en pajais cun conflicts armads interns cuntraditgia er a «l'emprova da la diplomazia svizra da schliar conflicts senza violenza». Armas na fineschian nagina guerra, uschia vegnia mo mess strom en il fieu, uschia la GSoA.
RR novitads 14:00