Il chantun Berna sto laschar liber 14 persunas or da l'arrest d'expulsiun. Pervi da la crisa da corona na pon ins betg sgular enavos ellas en lur patria. Tranter las persunas èn era trais commerziants da drogas sentenziads.
Il cusseglier guvernativ da Berna Philippe Müller – ha confermà envers l'agentura da novitads Keystone-SDA in rapport da la «Berner Zeitung». Tenor Müller n'èsi betg pussaivel d'evitar ch'ils trais Albanais svaneschan. Da survegliar las persunas na saja betg lubì.
Motiv: intschertezza cura ch'i dat puspè sgols
Las 14 persunas sajan vegnidas relaschadas perquai ch'ins na possia betg dir cura ch'ins possia sgular enavos ellas en lur patria. Detegnair vinavant las persunas fissi stà exagerà, ha ditg Müller.
Tranter las persunas èn era sis requirents d'asil, ch'èn vegnids refusads. Plinavant tschintg cas da Dublin: pia requirents d'asil che ston returnar enavos en il pajais nua ch'els èn vegnids registrads sco emprim.