Siglir tar il cuntegn

Header

cuntegn

Art represchentativ Premi Grand Prix per Barbara Frey

Il Grand Prix per art represchentativ svizzer, il pli aut premi d'art represchentativ da la Svizra, va quest onn a Barbara Frey. L’uffizi federal da cultura undrescha uschia la reschissura ed intendanta che lavura dapi 30 onns cuntinuadamain sco reschissura ed è stada dal 2009 fin il 2019 sco emprima dunna intendanta dal Schauspielhaus a Turitg.

Actualmain è ella per trais stagiuns (2021-2023) manadra artistica da la Ruhrtriennale. Ella inscenescha tar tribunas impurtantas da lingua tudestga, tranter quellas er al Burgtheater a Vienna. Frey saja sco intendanta prudenta in exempel en la scena da teater.

Er la sautunza Paola Gianoli, ch'è creschida si en il Puschlav, survegn in premi da l'Uffizi federal da cultura. Il premi è dotà cun 40'000 francs. Paola Gianoli s'engaschia dapi blers onns per la cultura en il Puschlav e cunzunt per purtar il saut en sia vallada, scriva l'uffizi.

Paola Gianoli
Legenda: Paola Gianoli. BAK / Charlotte Krieger

Ulteriurs otg artists e gruppas:

  • Frida León Beraud – giugadra da mariunettas e scenografa – Turitg
  • Marco Berrettini – coreograf – Genevra
  • Sophie Gardaz – actura – Vad
  • Geschwister Pfister – cabarettists da musica – Berna
  • Yann Marussich – sautunz – Genevra
  • Mike Müller – actur e satiricher – Turitg
  • Susanne Schneider/BewegGrund – pedagoga da saut e coreografa / communitad da saut – Berna
  • Ticino is Burning – gruppa da sautunzas e sautunzs – Tessin

Ils premis per la producziun da saut e teater, medemamain dotads a 40'000 francs, van a:

  • «La Peau de l'Espace» da Yasmine Hugonnet – saut – Vad
  • «Manuel d'exil» da Maya Bösch – teater – Genevra

Il «June Johnson Newcomer Prize» è dotà cun 25'000 francs e vegn finanzià da la Fundaziun Thomas Johnson per promover artistas ed artists professiunals che stattan a l'entschatta da lur carriera ed han potenzial spezial. Questa giada va il premi al collectiv argovian «InQdrt» enturn la sautunza e coreografa Isabella Spescha.

RTR novitads 11:00

Artitgels legids il pli savens

Scrollar a sanestra Scrollar a dretga