Tut en tut vegnia restituì quest onn radund 188 milliuns francs, communitgescha l'Uffizi federal per la sanadad. Ina part da questa summa paja la Confederaziun, l'autra vegn d'assicurads en chantuns ch'avevan pajà premias memia bassas.
Chantun Grischun po tegnair vi il maun
Il chantun Grischun tutga tar ils chantuns che survegnan daners. La summa n'è dentant betg fitg auta. Per persuna munta la cumpensaziun a 25 raps. Il pli bler survegn il chantun Vad cun 45.45 francs per persuna.
Dischequiliber durant ils onns 1996 e 2013
Tranter ils onns 1996 e 2013 han assicurads en nov chantuns pajà memia bler ed assicurads en 13 chantuns memia pauc premias da cassas da malsauns. Il mars 2014 ha il parlament decidì da cumpensar quai davent dal 2015 enfin il 2017 cun ina summa da total 800 milliuns francs. In terz da questa summa paja la Confederaziun, in terz las cassas da malsauns e l'ultim terz ils assicurads en chantuns ch'han pajà premias memia bassas. En cifras ston quests assicurads pajar in supplement da 48.- per persuna, prendì or ils assicurads en ils chantuns Lucerna (18.-) ed il Son Gagl e Vallais che han gia pajà l'onn passà tut ils supplements.
RR novitads 11:00