L'onn passà ha la Suva investì passa 1,6 milliuns francs en la reintegraziun da persunas ch'han gì in accident. Tras quai possia l'Institut svizzer d'assicuranza d'accidents spargnar en futur passa 20 milliuns francs per rentas e diarias. Sco quai che la Suva communitgescha, vegnian ils respargns da bun als assicurads en furma da premias pli bassas.
En total hajan ins il 2020 pudì reintegrar 67 persunas. 88% da quellas han pudì restar tar lur anteriur patrun. 12% han chattà ina nova plazza da lavur. Il pli savens han las persunas pertutgadas gì blessuras als schanugls, a las spatlas u han gì in trauma da la chavazza e dal tscharvè.
Novas perspectivas enstagl da renta
Cun il program da reintegraziun survegnian ils pertutgads ina nova perspectiva professiunala enstagl dad ina renta per vita duranta. En il focus dal program stettian persunas che na possian betg pli far la lavur usitada, scriva la Suva.
Dapi che la Suva ha instradà il program il 2016 han 267 persunas ch'han gì in accident puspè pudì vegnir integradas en il process da lavur. Tenor la Suva resulta or da quai in respargn da rentas e diarias en l'autezza dad 89 milliuns francs.
Impuls per las firmas
Èn las premissas ademplidas, surpiglia la Suva fin a 20'000 francs per la reintegraziun dad ina persuna. Sch'ina reintegraziun è lura vegnida realisada, po la Suva pajar supplementar in onurari da success da 20'000 francs a la firma.
Ord l'archiv da 10vor10:
