En il Cussegl naziunal era la proposta dal Cussegl federal vegnida crititgada fermamain. Ella saja bler memia favuraivla per las assicuranzas. Uschia aveva il Cussegl federal vulì pussibilitar a las assicuranzas da pudair visar ad in pazient l'assicuranza supplementara u da midar unilateral il contract. Quest punct ha la maioritad da la chombra pitschna er chattà memia bler.
Nagina responsabladad posteriura
Bleras autras decisiuns dal Cussegl naziunal ha il Cussegl dals chantuns dentant puspè midà. Uschia ha il Cussegl dals chantuns decidì ch'i na duai tuttina betg dar ina responsabladad posteriura tar assicuranzas supplementaras. Qua vai per malsognas ch'èn gia denturn cura ch'in contract curra giu, ellas n'èn dentant anc betg visiblas.
Il Cussegl naziunal ha vulì che las assicuranzas èn anc tschintg onns suenter la fin dal contract responsablas. Martin Schmid (PLD/GR) ha dentant fatg attent che quai possia chaschunar bleras expertisas e cas da dretgira. Il Cussegl dals chantuns è suandà el cun 24 cunter 17 vuschs.
Restrenschì dretg da desditga
Plinavant ha il Cussegl dals chantuns bain approvà il dretg da desditga sch'in contract vegn concludì. Da schlargiar quest dretg da desditga sin midadas considerablas dal contract, ha el dentant refusà.
Il Cussegl naziunal aveva er limità il dretg da desditga per las assicuranzas sin dus onns, en il cas ch'in segirà fa faussas indicaziuns. Questa limita ha il Cussegl dals chantuns er stritgà or da la lescha. En blers cas vegnian las faussas indicaziuns a la glisch pir bler pli tard, ha declerà Schmid.
Percunter ha il Cussegl dals chantuns decidì che la responsabladad da l'assicuranza na scroda betg cumplet tar in cas da donn ch'è gia capità, mabain be, sch'il donn è pir vegnì u vegnì mender entras las faussas indicaziuns d'in pazient.
Reducziun da premias duai esser pussaivla
Intginas midadas dal Cussegl dals chantuns van dentant er a favur dals assicurads. Tranter auter ha el schlargià l'obligaziun d'infurmaziun da las assicuranzas. I pazient duai pudair desdir il contract u pretender ina reducziun da premias, sch'il ristg d'in donn è vegnì considerablamain pli pitschen.
La fatschenta turna uss anc ina giada en il Cussegl naziunal.
RR novitads 16:00