A Swiss Re è uschia gartegià il sigl enavos en las cifras nairas: Suenter che l'assicuranza ha stuì crear il 2020 reservas da stgars 4 milliardas dollars, ha ella stuì nudar in minus da 900 milliuns dollars. L'onn 2021 ha Swiss Re ussa pudì finir cun in gudogn da 1,44 milliardas.
Bler meglier èsi ì en la fatschenta principala, la reassicuranza da chaussas. Cun ils custs da corona ch'èn crudads davent è la quota da donns e custs sa meglierada là per intgins puncts procentuals sin 97,1%. Pli cler ch'il dumber giascha sut 100% e pli profitabla che la fatschenta è.
Catastrofas natiralas
Strapatschà la cassa han dentant pliras catastrofas da natira sco il hurican «Ida», che ha furià la fin avust sur parts da New Orleans fin a New York. U er las malauras cun granella che han chaschunà durant la stad inundaziuns en Europa.
La radunanza generala propona al cussegl d'administraziun in gudogn per aczia da mintgamai 5,90, quai ch'è il medem nivel sco l'onn avant.