Sche pliras persunas partian in auto, pudessan ins uschia reducir il traffic e la polluziun da l’ambient, è l’idea da l’Astra. Quest model vegn gia duvrà en citads en ils Stadis Unids.
La dumonda per l’uschenumnà «carpooling» saja però pitschna en Svizra, di il perscrutader ed autur dal studi «Carpooling en il traffic da pendularis» Ueli Häfeli. La raschun saja la buna rait dal traffic public en Svizra. Tuttina dettia quai potenzial, per exempel en regiuns da cunfin nua che la rait dal traffic public saja main buna.