- Tar in'attatga sin ina gruppa da velocipedists èn quatter persunas vegnidas mazzadas, duas ulteriuras blessadas.
- Da las unfrendas sa tracti dad in Svizzer, dus Americans ed in Ollandais.
- La milissa terroristica Stadi Islamic è sa declerada responsabla per l'attatga.
- La Confederaziun pretenda da sclerir il cas dal tuttafatg.
Da la gruppa da total set persunas sajan ultra da quai vegnids blessads in Ollandais, in Franzos ed in'ulteriura persuna da la Svizra. Quai han inditgà las autoritads dal pajais en l'Asia Centrala.
EDA conferma
Il Departament federal d'affars exteriurs EDA ha confermà la mort dad in Svizzer e ch'ina Svizra saja vegnida blessada. Il departament stettia en contact cun la Svizra blessada, ils parents e las autoritads localas.
L'attatga saja capitada radund 150 kilometers en il sid da la chapitala Duschanbe. «Nus investigain en tuttas direcziuns», ha ditg il minister da l'intern Ramazon Hamro Rahimzoda en connex cun l'incident.
Trais attentaders morts
Tenor indicaziuns da las autoritads dal Tadschikistan ha la polizia fatg suenter l'attatga in'operaziun speziala e mazzà trais umens. Quatter ulteriurs umens suspectads hajan ins arrestà.
RR novitads 12:00++