Per tge vai? Cun l'aura bletscha e las temperaturas pli bassas sa derasa la grippa. Era las cifras da Covid creschan levamain. La fin d'avust hai dà 688 cas en in'emna, la fin da settember èn quai stads 1'012 cas, sco l'Uffizi federal da sanadad BAG scriva.
Tge cusseglia la Confederaziun? Il BAG cusseglia durant ils mais d'atun e d'enviern a persunas periclitadas spezialmain da sa vaccinar encunter Covid-19. Quai èn persunas
- pli veglias che 65 onns
- a partir da 16 onns cun malsognas preexistentas
- a partir da 16 onns cun trisomia 21
- dunnas en speranza
La vaccinaziun po proteger d'in decurs grev da la malsogna e da cumplicaziuns. Ad ulteriuras persunas na vegn betg cusseglià la vaccinaziun.
Plan da vaccinaziun svizzer
Quant gronda è la dumonda per vaccinaziuns? Tgi che vul sa laschar vaccinar po far quai tar tscherts medis da chasa, en blers ospitals gronds u era en apotecas. Las apotecas badan ch'igl è atun e la glieud vul sa proteger encunter virus, di Lydia Isler-Christ, la presidenta da l'uniun d'apotechers da Basilea-Citad. Els quintan ch'il basegn per vaccinaziuns encunter Covid vegnia l'enviern pli grond, la fulla na saja dentant betg uschè gronda, quai possia dentant midar spert.
Tge èn las sfidas actualas per las apotecas? Il mument na dastgan apotecas betg vaccinar en tut ils chantuns encunter Covid-19. En il chantun Appenzell Dadens èsi en general scumandà ed en il Tessin dastgan apotecas be vaccinar persunas enfin 65 onns. Cunquai ch'il BAG cusseglia la vaccinaziun a persunas sur 65 onns dettia qua ina cuntradicziun, di la Federaziun svizra d'apotecas, pharmasuisse. Perquai pretendan els ina schliaziun naziunala.
Co è la situaziun tar ils medis en connex cun la vaccinaziun? Tenor la Federaziun svizra da medis da chasa vegnian empustadas paucas vaccinaziuns, radund diesch giadas pli paucas che quellas encunter la grippa. Blera glieud saja sceptica envers la vaccinaziun da Covid-19, ed empustar quella be per ina persuna na rendia betg. Per il mainafatschenta da la federaziun èsi dentant cler: Tgi che vul sa laschar vaccinar survegn era ella.
Tgi surpiglia ils custs da la vaccinaziun? La Confederaziun ed ils chantuns han organisà il provediment cun vaccins dapi l'entschatta da la pandemia. Enfin la fin da zercladur è la vaccinaziun stada gratuita. Dapi lura va il quint a la cassa da malsauns. Sche la vaccinaziun è cussegliada per ina persuna, surpiglia la cassa ils custs, senza participaziun als custs da pazient u pazienta. Persunas che na tutgan betg tar in da las gruppas da risico ston pajar sezzas la vaccinaziun. Quai custa per exempel en l'ospital a Berna radund 100 francs per dosa.