Siglir tar il cuntegn

Header

cuntegn

Svizra Auals da Son Gagl contaminads fermamain

Suenter analisar la qualitad d'aua da tschintg auals durant plirs mais tira l'Uffizi per aua ed energia dal chantun Son Gagl ina bilantscha alarmanta.

Tut ils tschintg auals hajan purtà aua ch'è contaminada memia fitg. La valur da substanzas nuschaivlas era bunamain sur tut il temp memia auta. Quai veglia dir ch'i haja en mintga aual tantas substanzas nuschaivlas che quellas possian effectuar donns acuts u donns a lunga vista. En in cas extrem saja l'impestaziun 160 giadas sur la valur da cunfin.

Il pli grond problem: pesticids

Tar la gronda part da las substanzas nuschaivlas sa tractia da pesticids. Quels sajan savens era responsabel per la nauscha qualitad da l'aua. L'Uffizi chantunal per aua ha dentant er chattà memia autas valurs da restanzas da medicaments e chemicalias industrialas en ils auals.

Daco uschè autas valurs da PFOS?

Tranter las chemicalias hajan ils experts er chattà autas valurs da perfluoroctansulfonat (PFOS). Quai è ina substanza toxica, che viva ditg, che po far donn a mammals e che po er sa concentrar en la chadaina da nutriment. PFOS è dentant scumandà dapi il 2011 – cun paucas excepziuns. Perquai sa dumondan ils experts daco e danunder che talas substanzas vegnan en ina auta concentraziun en ils auals.

Ils experts veglian ir a la funtauna da las substanzas nuschaivlas e quai betg be per ils tschintg auals examinads enfin uss, mabain en general.

Situaziun da qualitad d'aua en Grischun

Cun excepziun da la Val dal Rain è la qualitad da l'aua en il Grischun sin in nivel nunalarmant. Auter ch'il chantun Son Gagl, ha il chantun Grischun dentant analisà auas sutterranas e betg ils flums ed auals.

RR novitads 15:00

Artitgels legids il pli savens