Suenter plievgia intensiva è la situaziun d'auas grondas sa calmada en blers lieus en Svizra. Tuttina è il nivel da tschertas auas anc adina fitg aut enfin precar. Uschia è il nivel a la riva dal sid dal Lai da Neuchâtel aut. Las autoritads quintan che l'aua creschia anc e cuntanschia ses zenit la sonda. Perquai vegn gia prendì mesiras cun metter satgs da sablun.
Nivels auts er en autras regiuns
Er auters lais en la Bassa han aua gronda. Uschia è il nivel dal Lai da Bienna sis meters sur il cunfin d'auas grondas – actualmain sin passa 430 meters. Persuenter è la situaziun sa calmada sin il Rain a Basilea ed er a Sachseln en il chantun Sursilvania. Là n'ha nagin pli stuì vegnir evacuà.
Tunnel da basa Lötschberg serrà
Pervia da la blera plievgia ha er il tunnel da basa dal Lötschberg stuì vegnir serrà, sco l'interpresa da viafier BLS ha communitgà. La notg sin gievgia saja aua cullada en il tunnel. Experts èn actualmain londervi d'eruir la dimensiun. Ils trens vegnan sviads sur il Lötschberg. Passaschiers tranter Spiez e Visp ston quintar cun trens che crodan ora, sviaments e retards.
Dapi la dumengia hai localmain dà passa 100 liters aua per meter quadrat, sco Meteonews scriva. Cunquai ch'il terren è gia bletsch s'auzian uschia ils livels da lais e flums.
