Dapi la pandemia s'annunzian dapli recrutas e recruts tar il servetsch psicologic-pedagogic da l'armada ch'avant. Sco quai ch'in represchentant dal servetsch ha ditg envers SRF, hajan ins constatà in augment da fin 30% aifer ils ultims dus onns. Quest trend paria er da sa confermar quest onn. Bleras da las recrutas e dals recruts pertutgads na vegnian betg a frida cun la midada da la vita civila en la vita militarica. Els pateschian da disturbis da s'adattar e maldispostadad depressiva. La pandemia haja anc rinforzà il problem.
Il schaner ha la scola da recruta da l'enviern cumenzà cun var 14'500 recruts e recrutas. Radund 1'200 persunas sajan vegnidas testadas positiv sin il coronavirus, las bleras gia avant ch'entrar en servetsch. In'ulteriura mesira dal concept da protecziun da l'armada è ch'i na dat nagina sortida ed ils recruts e las recrutas na dastgan era betg ir a chasa la fin d'emna.
