En Svizra hai dà per inqual ina surpraisa da naiv questa damaun. Las regiuns da las Prealps centralas ed orientalas, han survegnì radund 25 fin 30 centimeters naiv nova, sco l'Uffizi federal per meteorologia ha ditg a l'agentura da novitads Keystone-SDA. Ad Escholzmatt en l'Entlebuch per exempel hajan ins mesirà questa damaun 28 centimeters naiv nova.
Era en il Grischun turna l'enviern
Er en Grischun hai navì. Tenor las staziuns da mesirar da MeteoSvizra haja dà a Bivio 20 centimeters naiv nova, ad Arosa 14 centimeters, a Segl-Maria 9 centimeters ed a Mustér 6 centimeters. En la regiun Cuira n'hai dà nagina naiv.
Cun la naiv nova en ils auts resta il privel da lavinas en diversas regiuns dal Grischun considerabel (stgalim 3). Quai vala per l'Engiadin'Ota, il Surses e la gronda part dal Grischun dal Nord. En il rest dal Grischun vala in privel da lavinas moderà (stgalim 2).
Direct tar il bulletin da lavinas
Naiv durant l'avrigl betg raritad
Tenor ils meteorologs n'è naiv durant l'avrigl però betg uschè rar. En general saja adina puspè da quintar cun capriolas e quai en domaduas direcziuns. Pia poi far da stad cun temperaturas enturn 25 grads ni er d'enviern cun naiv e scheliras.
Per exempel ils 15 d'avrigl 1999 hai dà a San Bernardino entaifer 24 uras 130 centimeters naiv nova. U era ils 19 d'avrigl 2013 hai dà 74 centimeters naiv nova a Beiva. La raschun per quai saja ch'i vegnia savens durant l'avrigl nà dal sid aria umida, quella tegnan las alps si ed ella sa svida lura per lung las alps e lura vegnian adina puspè grondas massas da naiv ensemen.