Siglir tar il cuntegn

Header

cuntegn

Aura Malauras custan la vita ad ina persuna

Danovamain ha ina front d’urizis cuntanschì la Svizra. Gia il suentermezdi hai dà ferm vent e granella sur la Svizra Romanda. Polizia e pumpiers han stuì reagir pliras tschient giadas – sulet en il chantun Friburg 300 giadas. A Bulle è per exempel ina classa vegnida en la granella. Sis da 16 uffants sco er ina persuna creschida han stuì ir en l'ospital.

Al sid dal Giura hai dà vent cun ina fermezza da 101 kilometers l'ura. Al Chasseral hai perfin dà vents da fin a 120 kilometers l'ura, sco Meteonews ha rapportà sin twitter. A La Chaux-de-Fonds hai dà entaifer in'ura passa 20 mm plievgia. Sin la lingia da tren tranter Payerne e Kerzers hai dà retards pervi d'ina planta ch'è crudada sin ils binaris.

In mortori a Berna

Las malauras da glindesdi saira han chaschunà in mortori en il chantun Berna. A Meikirch è ina dunna vegnida blessada mortalmain suenter ch'ina planta è cupitgada sin ses auto.

En il chantun Turitg han las forzas da salvament survegnì bunamain 400 telefons d’alarm. Tranter auter èn ils pumpiers er stads en acziun pervi da puntanadas ch’èn cupitgadas ed aua en bajetgs.

Donns da 74 milliuns francs

Las malauras dal glindesdi saira en Svizra vegnian a custar enturn 74 milliuns francs. Quai stima l'assicuranza Axa. Tenor l'assicuranza èn las ultimas malauras tranter las trais las pli vehementas dals ultims 12 onns. Il 2021 saja gia uss l'onn cun ils pli blers donns dapi il 2013. Gia l'emna passada avevan las assicuranzas svizras nudà donns da malauras d'en tut almain 260 milliuns francs.

Er en Grischun poi vegnir bletsch

Er en Grischun hai pluvì la notg per part ferm, er cun urizis. Las temperaturas sa sbassan a Cuira fin sin 16 grads. Oz èsi lura per part sulegliv e sur tut il suentermezdi e la saira poi plover u er puspè dar local urizis.

RTR novitads 06:00

Artitgels legids il pli savens

Scrollar a sanestra Scrollar a dretga